AQSh osmonida sirli havo shari paydo boʻldi

Maʼlum boʻlishicha, mazkur havo shari josuslik maqsadida ishga tushirilgan boʻlishi mumkin. 2023-yil boshida AQSh havo hududi orqali sirli josuslik yuklari bilan bogʻliq shov-shuvdan soʻng, harbiylar yana bir sharni aniqlaganini aytmoqda.

NBC News bu voqeani vaziyatdan xabardor uch AQSh rasmiysiga tayanib eʼlon qildi. Manbalarga koʻra, havo shari Gavayi orollaridan boshqa hech qanday shubhali hududlar uzra uchmagan. Xabar qilinishicha, AQSh harbiylari oʻtgan hafta oxiridan beri havo sharini kuzatib kelyapti. Obyekt havo qatnovi yoki milliy xavfsizlikka xavf tugʻdirmaydi va hech qanday signal chiqarmaydi yoki qabul qilmaydi. U asta-sekin Meksika tomon harakatlanmoqda. Hozircha havo sharining egasi nomaʼlum.

Mudofaa vazirligi matbuot kotibining aytishicha: “Havo shari toʻgʻridan-toʻgʻri muhim mudofaa infratuzilmasi yoki AQSh hukumatining boshqa muhim obyektlari ustidan uchib oʻtmagan, yerdagi odamlarga harbiy yoki jismoniy xavf tugʻdirmagan”.

Ayni paytda mazkur havo shari Xitoy davlatiga tegishli, degan taxminlar ilgari surilmoqda. Bunga sabab qilib xuddi shu kabi holatning oldinroq kuzatilgani aytilgan.

Giglink.uz avvalroq AQSh va Xitoy o‘rtasida boshlangan yerosti simlari urushi haqida xabar bergandi. AQSh va Xitoy suv ostidagi internet kabellari musaboqasida kim g‘olib bo‘lishi haqida bu yerda batafsil o‘qishingiz mumkin — https://giglink.uz/p/3807529