Xiaomi uzoq kutilgan Redmi K80 Pro flagmanini taqdim etdi

Xitoyda Xiaomi o'zining yangi yuqori darajadagi Redmi K80 Pro smartfonini rasman e'lon qildi. Qurilma eng so'nggi Qualcomm Snapdragon 8 Elite protsessori bilan jihozlangan bo'lib, asosan o'yin ishqibozlariga mo'ljallangan.

Redmi K80 Pro eng so‘nggi Qualcomm Snapdragon 8 Elite protsessori bilan ishlaydi, bu esa smartfonni juda tez va qulay ishlashini ta'minlaydi — ilovalarni ochish, o‘yin o‘ynash yoki internetda tez sur'atda ishlash uchun juda mos.

Smartfonning akkumulyatori juda kuchli — 6000 mA/soat sig‘imga ega. Bu esa telefoningiz uzoq vaqt zaryad qilmasdan ishlashini kafolatlaydi. Shuningdek, 120 vattli tezkor quvvatlanish texnologiyasi orqali telefonni juda qisqa vaqt ichida to‘liq zaryadlash mumkin. Bundan tashqari, telefon 50 vattli simsiz quvvatlanish imkoniyatiga ham ega — zaryad qilish uchun sim kerak emas, maxsus qurilmaga qo‘ysangiz bo‘ldi!

Redmi K80 Pro telefonining kamerasi uchta moduldan iborat bo‘lib, juda sifatli suratga olish imkonini beradi:

- 50 MP asosiy kamera: Suratlaringiz tiniq va yorqin chiqishi uchun keng ko‘rinish va yaxshi ranglar balansi bilan suratga oladi.

- 50 MP telefoto kamera: Yaqinlashtirib suratga olish uchun ideal. Masalan, uzoqda turgan narsalarni sifatni yo‘qotmasdan 2,5 baravar kattalashtirib yoki 10 sm masofadan makro suratga olish imkonini beradi.

- 32 MP ultra keng burchakli kamera: 120° burchakni qamrab oladi, ya’ni keng ko‘rinishdagi suratlarni bemalol olishingiz mumkin. Bundan tashqari, 5 karra sifatni yo‘qotmasdan kattalashtirish va maksimal 20 karra zoom imkoniyatiga ega.

Bu kameralar birgalikda har qanday vaziyatda ajoyib surat va videolar olish uchun mo‘ljallangan.

Redmi K80 Pro katta, 6.67 dyuymli ekran bilan jihozlangan bo‘lib, unda barcha tasvirlar aniq va tiniq ko‘rinadi. 2K sifatdagi ekran videolarni tomosha qilish yoki o‘yin o‘ynash uchun juda qulay. Ekran juda yorqin bo‘lib, quyosh nuri ostida ham hamma narsani oson ko‘rishingiz mumkin.

Telefon IP68/IP69 standartlariga muvofiq suv va changdan himoyalangan, ya’ni yomg‘ir yoki changli muhitda xavotirlanmasangiz ham bo‘ladi.

Yana, bu smartfon quyidagi qo‘shimcha qulayliklarga ega:

- Stereodinamiklar: Musiqalar va videolarni baland va sifatli ovozda eshitishingiz mumkin.

- NFC texnologiyasi: Telefon orqali to‘lovlarni osongina amalga oshirish uchun qulay.

- Infraqizil port: Masofadan boshqariladigan moslamalarni (masalan, televizor yoki konditsioner) boshqarish imkonini beradi.

- Yangi avlod vibratsiya motorlari: Bu texnologiya telefonni ishlatishda yanada yoqimli va qulay hislarni ta'minlaydi.

Qurilma HyperOS 2.0 operatsion tizimi (Android 15 asosida) bilan ishlaydi.

Smartfon quyidagi variantlarda taqdim etiladi:

- 12/256 GB xotira bilan — $511

- 16 GB operativ xotira va 1 TB ichki xotira bilan — $665

Xiaomi Redmi K80 Pro xalqaro bozorda sotilmasligi mumkin, lekin bu qurilmaning biroz o‘zgartirilgan versiyasi Evropada Poco brendi ostida sotuvga chiqarilishi ehtimoli bor. Buni kuzatishda davom etamiz.