Meta kampaniyasi: Facebook’da o‘g‘irlangan kontentga qarshi kurashni kuchaytirdi

Joriy yilning o‘zida kompaniya 10 millionga yaqin soxta yoki taqlidchi profilni o‘chirib tashlagan. Shuningdek, spam tarqatgan va soxta faoliyat bilan shug‘ullangan 500 mingdan ortiq akkauntga qarshi choralar ko‘rilgan — ularning kommentlari tushirib yuborilgan, kontent tarqalishi cheklangan va monetizatsiya qilish imkoniyati yopilgan.

Bu yangilik YouTube o‘zining “asl bo‘lmagan kontent” siyosatini qat’iylashtirishini e’lon qilganidan bir necha kun o‘tib paydo bo‘ldi. Endi Facebook ham xuddi shunday yo‘l tutmoqda.

  Kimlar jazolanadi?
 Meta ta’kidlashicha, boshqalarning kontentini qayta ishlamay, o‘zgartirmay, shunchaki qayta yuklaydigan akkauntlar jazoga tortiladi. Biroq trendlarga qo‘shilib, reaksiya videolari tayyorlaydigan yoki o‘z fikrini qo‘shib ijod qiladigan foydalanuvchilar bunday cheklovlardan xoli.  

Jazo qanday bo‘ladi? – Monetizatsiya dasturlaridan vaqtinchalik chetlatish – Postlarning tarqalishini kamaytirish – Nusxa videolarga original manbaga yo‘naltiruvchi havola qo‘shish

Meta, shuningdek, ijodkorlarga maslahat sifatida “autentik hikoya qilishga” e’tibor qaratishni, qisqa-qisqa parchalarni birlashtirib qo‘yish yoki faqat suv belgisi qo‘shib chiqishni to‘xtatishni tavsiya qilmoqda. Video taglavhalari ham sifatli bo‘lishi kerak, avtomatik AI tarjimalarni tahrirsiz ishlatish mumkin emas.

Kengaytirilgan nazorat va shikoyatlar
So‘nggi paytlarda Meta avtomatik filtrlari sabab ko‘plab foydalanuvchilar asossiz bloklanganidan shikoyat qilib, 30 mingga yaqin imzo to‘plagan ariza yuborgan. Bu kichik bizneslarga ham zarar yetkazgan. Hozircha Meta bu borada ochiq izoh bermagan.

Qachon kuchga kiradi?
Yangiliklar kelgusi oylar davomida bosqichma-bosqich joriy qilinadi. Kontenti tarqalmayotgan ijodkorlar Facebook Professional Dashboard orqali sababini ko‘ra olishadi. Shuningdek, kimning monetizatsiya yoki tavsiya qilish imkoniyati xavf ostida turgani Support bo‘limida ko‘rsatiladi.

Meta har chorakda o‘zining shaffoflik hisobotlarini e’lon qiladi. Oxirgi hisobotga ko‘ra, Facebook’dagi faol foydalanuvchilarning 3 foizi soxta akkauntlar bo‘lib, yanvar–mart oylarida 1 milliardga yaqin soxta akkauntga chora ko‘rilgan.