Apple amerika harbiylari bilan ishlaydigan texnologik kompaniyani sotib oldi

Apple kompaniyasi AR-texnologiyalari sohasidagi Mira startapini sotib oldi. Ushbu startap AQSh qurolli kuchlari va Nintendo o‘yinlar korporatsiyasininig (Yaponiya) hamkori hisoblanadi. The Verge nashri bu haqda Mira bosh direktori Ben Tafning Instagramdagi sahifasiga asoslanib xabar qilmoqda.

Garchi bitimning qiymati ochiqlanmagan bo‘lsada, The Verge ma’lumotlariga qaraganda, Miraning bozor narxi $17 mlnga teng. Bu startap oldin Applening sobiq dizayneri Joni Ayvga aloqador bo‘lganligi haqida mish-mishlar bor.

Miraning asosiy mahsulotlaridan biri Virtaul reallik garniturasi Prism Pro hisoblanadi. Kompaniyada ushbu uskunani yetkazib berish bo‘yicha AQSh harbiy havo kuchlari va harbiy dengiz kuchlari bilan tuzilgan shartnoma bor. Ular Miraga taxminan $702 000 to‘lab qo‘yishgan. Kompaniyalar qo‘shilganidan so‘ng, Apple harbiylar bilan hamkorlikni bekor qilmoqchi.

Miraning yana bir yirik hamkori Nintendo kompaniyasi bo‘lib, bu kompaniya shu paytgacha o‘zining Yaponiya va Los Anjelesdagi Mario Kart mavzuli parklaridagi attraksionlari uchun startapdan garnituralar xarid qilib kelmoqda. Bitim doirasida Apple Miraning kamida 11 xodimini o‘ziga og‘dirib olganligi xabar qilinmoqda.

Apple Mirani “o‘z komiga tortganligini”ni tasdiqlamagan bo‘lsada, muntazam ravishda kichik kompaniyalarni sotib olayotganligini inkor qilmadi.